Carmen

Nubila pellit

Grandine foeta

Aere sonoro

Turribus altis

5

Edita tandem

Machina tanto

Fulsa decore

Gloria numquam

Desinet axis

10

Dum vehet orbem

Libera tristi

Facta timore

Saecula vivens

Cuncta loquetur.

15

Pulsabat solida et toti notissima mundi

      Per coelum et terras fama vagata mea est.

Turbida tempestas rupit me sola Tyferni

      Nubila dum sonitu rumpere posse puto.

Me miserum fulvi rapiebant frustra metalli

20

      Et qui curaret reddere nemo fuit.

Sed me iterum Fernus vigili sudore Michael

      Iam tandem fudit prae pietate meus.

Sint gratiae Domino

Petri Sabini in nova Campani editionem decastichon

Perlege Campani numerosa volumina lector

Non otiosas paginas;

Nam proprii et pressi cultor sermonis ubique est

Priscis cedere nescius.

5

Gratia magna tibi referenda est FERNE MICHAEL

Quod ductu tuo prodeunt.

Sicut Maeonios versus Pisistratus olim

Haec undecumque colligis.

Ergo ut durat adhuc tanti pia fama Tyranni

10

Sic te posteritas colet.

Ad Sabinum

Hei mihi quam vana est spes haec et gloria famae

      Pro fama morimur docte Sabine fame.

Stet sua per totum virtutis gloria mundum

      Recte vive deo cetera fumus erunt.

Michael

Rumpite si libeat iam nunc mea stamina parcae,

      Imperium vitae non habet ulla meae.

Vivere quod posthac properantia fata negarint

      Id mihi Campani iam monimenta dabunt.